Paroles

Mon rèiregrand s’apelava Balo, un ors

tinhós que podiá d’un butassal fotre un pin

centenari pel sòl.

Mon grand s’apelava Balo. Èra la terror de

la selva amb un macarèl de gronhament

a te far dreiçar los pelses sus l’esquina

a vint kilomètres, un gronhament qu’a

costat d’aquel los de Jurassic Park èran

de farlabica.

Mon paire s’apelava Balo, que podiá manjar

d’un còp un vintenat de salmons sens aver

una crisi de fetge.

E ieu m’apèli Balo..

E mon filh tanben s’apelarà Balo.

Soi un eslovèn, d’una familha d’eslovèns

plantigrads de paire en filh.

Vaquí per las presentacions

 

Repic :

Balo mon fraire

Balo mon fraire

Siàs estrangièr

Soi trop luènh de ma terra

(siàs trop luènh de ta terra)

Ma terra eslovèna

(ta tèrra eslovèna)

Largat dins los Pirenèus

Balo mon fraire

Balo mon fraire

Siàs (soi) estrangièr

 

Mon istòria es l’istòria d’un expatriat

involontari e pas clandestin que soi arribat

en França dins un camion oficial del govèrnament

menat per vint-e-quatre motards,

coma lo Sarkozy.

Èri aqui, que diguèron, per amenar una

contribucion à la biodiversitat.

Dal còp, me montèri plan lo còl, mas lèu

descantèri quand me metèron un colar

G.P.S e un emissor dins lo ventre coma lo

Robocòp, que bronzinava, bronzinava e me

fotèt de bravas colicas. Ambe tota aquela

electronica, pensabi qu’arribariá a captar

totas las radiòs.

 

Ici Londres…Les ours hiberneront après

avoir mangé le miel…

 

E me vaquí victima de la deslocalizacion

dins un païs que conéissi pas…un polit

païs, pr’aquí pr’aquò, mas un païs ambe de

madurs vestits de verd, d’amòrris amagats

dins los bartasses e qu’ensajan de me

plombar lo cuol.

Quina vergonha ! E tot aquò per qualquas

fedas, per qualques pichons prelèvaments

suls tropèls per çò que pòdi pas viure de

rasonaments e d’aiga fresca !

Pensi qu’aquò dèu èsser una venjança dels

pastres que me pòdon pas véser.

Mas i pòdi pas res se soi un animal totemic

e se, un còp èra, d’orses occitans venián de

còps raubar de pastorèlas !

Cal avertir lo Dalaï Lama o la Brigida Bardòt,

la Bela del Ciné que totòm a sa fotò !

 

Ont es l’amor dins tot aquò ? E consí trapar

una femèla, que sèm que quatre pelats dins

tota la cadena dels Pirenèus ?!

Aviá rendetz-vos ambe la Franska, mas

moriguèt sus l’estrada per ço que portava

pas de gilet jaune, que la lei èra pas encara

passada.

Me caldrà passar benlèu del costat

espanhòl !

Monsur Zapaterò ! Se dits qu’al vòstre païs

n’i a mai de femèlas e que son mai caudas

coma la Bèla de Cadiz !

Aicí es la misèria sexuala ! E totjorn aqueles

caçaires !

L’ivèrn passat, m’a calgut prener de somnifèris

per dormir e fasquèri pas que somiar,

somiar que descendiá dins la Granda Vila e

que fotiá de bravas morniflas als buildings

coma lo Godzilla.

M’auràn pas ! Farai pas coma lo King Kong

qu’acabèt sa corsa ennaut d’un gratacèl e

se batèt a còps de punh contra los avions.

Montarai a Montsegur.

A Montsegur, segur que me traparàn pas.

Aquel monde es lo monde del diable !

E ièu soi vengut catar, catar, catar !